Մասնագիտական վերապատրաստում
ԵՊՀ Շարունակական կրթության կենտրոնը իրականացնում է մասնագիտական վերապատրաստման բազմաբնույթ ծրագրեր՝ տարբեր թիրախային խմբերի համար: Ծրագրերը մշակվում են մասնակիցների կարիքների գնահատման հիման վրա և իրականացվում ինչպես ԵՊՀ, այնպես էլ հրավիրյալ դասախոսների կողմից:
Ծրագիրն ավարտած և ամփոփիչ ատեստավորումն անցած մասնակիցներին տրվում է ԵՊՀ սահմանած նմուշի ավարտական փաստաթուղթ (հավաստագիր, վկայական):
ԵՊՀ-ում իրականացվում է ՀՀ քաղաքացիական ծառայողների վերապատրաստում՝ տարբեր մասնագիտություններով, ուսուցիչների մասնագիտական վերապատրաստում, ինչպես նաև ֆիզիկական անձանց վերապատրաստում «Գործնական հոգեբանություն» մասնագիտությամբ:
Քաղաքացիական ծառայողների վերապատրաստում
Հասարակայնության հետ կապերի հետագա զարգացումը ապահովելու և հանրային ծրագրերում առավելագույնս ներգրավվելու նպատակով ԵՊՀ-ում 2003-ից իրականացվում է ՀՀ քաղաքացիական ծառայողների, 2011-ից՝ նաև ՀՀ Ազգային անվտանգության խորհրդի և ՀՀ պաշտպանության նախարարության աշխատակազմի քաղաքացիական հատուկ ծառայողների մասնագիտական վերապատրաստում:
Հանրային ծառայողների վերապատրաստման ծրագիրը ԵՊՀ-ում կազմակերպական և բովանդակային առումով պարբերաբար զարգացում է ստանում: Հաճախ իր իսկ նախաձեռնությամբ արդիականացնելով դասընթացների ծրագրերը՝ ԵՊՀ-ն հանձնառություն ունի երկրում հանրային ծառայության համակարգի կայացման գործում:
